השליחים, Chapter 4 ד

א. ויהי כדברם אל־העם ויקומו עליהם הכהנים ושר צבא ההיכל והצדוקים    ב. כי־צר להם על־אשר הורו לעם ועל־אשר הגדו בישוע את־תחית המתים    ג. וישלחו ידיהם בם ויתנום במשמר עד־למחר כי־כבר הגיע הערב    ד. אך רבים משמעי דברי הבשורה האמינו ויהי מספר האנשים כחמשת אלפים    ה. ויהי ממחרת ויקהלו השרים הזקנים והסופרים בירושלים    ו. וחנן הכהן הגדול וקיפה ויוחנן ואלכסנדרוס וכל־אשר למשפחת בית הכהן הגדול    ז. ויעמידו אתם בתוך וישאלום לאמר בכח־מי או בשם־מי עשיתם כזאת    ח. ופטרוס מלא רוח הקדש ענה אתם לאמר שמעוני שרי העם והזקנים    ט. כי־נחקר היום על־אדות מעשה טוב לידוע חלי ובמי באתהו ישועה    י. יודע לכם כלכם ולכל־עם ישראל כי־בשם ישוע המשיח הנצרי אשר אתם צלבתם ואלהים הקימו מן־המתים בשמו הוא עמד לפניכם בריא אולם    יא. זאת היא האבן אשר מאסתם אתם הבונים ותהי לראש פנה    יב. ואין ישע בלתו כי לא־נתן שם אחר לבני אדם תחת השמים אשר־בו נושעה    יג. ויהי כאשר ראו אמץ לב פטרוס ויוחנן וגם־הבינו כי הדיוטים הם ולא מלמדי ספר כן תמהו עליהם ויכירום כי היו עם־ישוע    יד. ובראתם את־האיש הנרפא עמד עמהם לא יכלו לענות בם דבר    טו. ויצוו אתם לצאת אל־מחוץ לסנהדרין ויועצו ביניהם    טז. ויאמרו מה־נעשה לאנשים האלה כי מופת ברור נעשה על־ידיהם גלוי הוא לכל־ישבי ירושלים ואין לכחש    יז. אך פן־תפרץ השמועה ופשתה בעם נגערה בם לבלתי דבר עוד לאיש בשם הזה    יח. ויקראו אתם ויצוו עליהם לבלתי דבר דבר ולא ללמד בשם ישוע    יט. ויענו אתם פטרוס ויוחנן ויאמרו הכי טוב בעיני האלהים כי נשמע אליכם משמע אליו שפטו־נא אתם    כ. כי לא נוכל לחדל מדבר את אשר ראינו ושמענו    כא. והם הוסיפו לגער־בם וישלחום מבלי מצא ידים לענוש אתם מיראתם את־העם כי כלם נתנו כבוד לאלהים על־דבר המעשה ההוא    כב. כי למעלה מארבעים שנה היה האיש אשר נעשה־עמו אות הרפואה    כג. ויהי כאשר שלחו ויבאו אל־אחיהם ויספרו להם את אשר אמרו אליהם ראשי הכהנים והזקנים    כד. והם שמעו וישאו את־קולם בלב אחד אל־אלהים ויאמרו יהוה אתה הוא אשר עשית את־השמים ואת־הארץ ואת־הים ואת־כל־אשר־בם    כה. ובפי עבדך דוד אבינו אמרת ברוח הקדש למה רגשו גוים ולאמים יהגו־ריק    כו. יתיצבו מלכי־ארץ ורוזנים נוסדו־יחד על־יהוה ועל־משיחו    כז. כי באמת על־ישוע עבדך הקדוש אשר אתה נסכת נוסדו יחדו בעיר הזאת גם־הורדוס ופנטיוס פילטוס עם־הגוים ועממיך ישראל    כח. ויעשו את אשר יעשה לפי ידך ולפי עצתך אשר חרצת מקדם    כט. ועתה יהוה השקיפה אל־גערתם ותנה לעבדיך לדבר דברך ביד רמה    ל. כי תשלח ידך לרפא חולים ולעשות אתות ומופתים בשם ישוע עבדך הקדוש    לא. ויהי בהתפללם וינע המקום אשר נקהלו שמה וימלאו כלם רוח הקדש וידברו דבר האלהים ביד רמה    לב. וקהל המאמינים היה להם לב אחד ונפש אחת ולא אמר איש מהם על־שלו כי לו הוא כי אם־את־אשר היה להם לנחלת כלם    לג. והשליחים נתנו עדותם על־תחית האדון ישוע בעז גדול וחן רב הוצק על־פני כלם    לד. ולא נמצא בהם איש חסר מאומה כי כל־בעלי שדות ובתים מכרו אתם ויביאו את־כסף מחירם    לה. אשר שמו לרגלי השליחים להחלל לאיש איש כדי מחסרו    לו. ויוסף אשר קראו לו השליחים בר־נבא על־כי הוא מוכיח כנביא איש לוי מארץ קפרוס    לז. מכר את־השדה אשר היה לו ויבא וישם את־כספו לרגלי השליחים