העברים, Chapter 13 יג

א. שמרו אהבת אחים ביניכם תמיד    ב. ואל־תשכחו מהכניס ארחים מאהבה כי באהבה זו יש אשר בבלי־דעת הכניסו מלאכים את־בתיהם    ג. זכרו את־האסירים כמו אם־אתם אסורים עמהם ואת־הנלחצים כאשר גם־אתם עמהם בבשר אחד    ד. קדש תהיה האישות לכל־איש מכם לא תחללו את־יצוע איש ואת־זנים ונאפים ישפט אלהים    ה. הרחיקו דרככם מאהבת כסף ושמחו בדי חלקכם כי הוא אמר לא ארפך ולא אעזבך    ו. על־כן נבטח ונאמר יהוה לי בעזרי לא אירא מה־יעשה לי אדם    ז. זכרו את־מאשריכם אשר־הגידו לכם דבר האלהים בינו לתכלית דרכם ולכו באמונתם    ח. ישוע המשיח הנו הוא אתמל והוא היום והוא לעולם ועד    ט. אל־תמוטו מפני תורת שנות וזרות כי טוב ללב אשר חסד יסעדנו לא חקי מאכלים חקים לא־טובים לבעליהם    י. יש־לנו מזבח אשר לאכל מעליו אין משפט למשרתי המשכן    יא. כי־פגרי הזבחים אשר דמם הובא אל־הקדש ביד הכהן הגדול לכפר עון נשרפו מחוץ למחנה    יב. בעבור זאת גם־ישוע לאשר יקדש את־העם בדמו ענה מחוץ לשער    יג. על־כן נצאה־נא אליו אל־מחוץ למחנה ונשא את־חרפתו    יד. פה אין־לנו עיר עמדת לעד אך העיר העתידה אנו מבקשים    טו. ועתה נקריב על־ידו זבחי תודה לאלהים תמיד הלא הם פרי שפתינו הנתנות תודה לשמו    טז. אך לגמל־טוב ולפזר לאביונים אל־תשכחו כי־זבחים כאלה הם לריח ניחח לאלהים    יז. שמעו אל־מאשריכם והכנעו מפניהם כי־שקדים הם על־נפשתיכם כעמדים לתת דין וחשבון בעבור יעשו כזאת בחדוה ולא באנחה כי לולא כן לא־טוב לכם הדבר הזה    יח. התפללו עלינו כי־ידענו מאד כי נכון לבנו ולהתהלך במישרים תמיד כל־חפצנו    יט. ובחפץ יתר אני שאל מעמכם לעשות זאת לבעבור יתן לי לשוב אליכם עד־מהרה    כ. ואלהי השלום אשר בדם ברית עולם הקים מן־המתים את־רעה הצאן הגדול את־ישוע אדנינו    כא. הוא יכונן אתכם בכל־מעשה טוב למלא את־חפצו ויפעל עמכם כטוב בעיניו ביד־ישוע המשיח אשר־לו הכבוד לעולם ועד אמן    כב. ואני שאל מעמכם אחי שאו־נא דברי מוסרי כי־מעט מזער כתבתי אליכם    כג. ודעו כי טימותיוס אחינו יצא לחפשי ואם־יבא בקרב הימים אראה אתו את־פניכם    כד. שאלו לשלום כל־מאשריכם וכל־הקדושים ואלה אשר מאיטליא פקדים לשלום לכם    כה. החסד עם־כלכם אמן