א. את־אלה דבר ישוע וישא עיניו למרום ויאמר אבי גדל כבוד בנך כי בא מועד ובנך יגדל כבודך
ב. כאשר אתה תמשילהו בכל־בשר לתת חיי עולם לכל אשר־נתתה לו
ג. ומה חיי עולם אשר ידעו אתך כי אתה לבדך אל־אמת ואת־ישוע המשיח אשר שלחת
ד. את־כבודך גדלתי בארץ כליתי את־המלאכה אשר נתתה לי לעשתה
ה. ועתה כבדני־נא עמך אבי בכבוד אשר היה־לי עמך טרם נעשו שמים וארץ
ו. הודעתי את־שמך לאנשים אשר אתם נתתה־לי מן־העולם לך היו ואתה נתתם לי והם אמרתך ינצרו
ז. ידעים הם כיום כי־כלם אשר נתתה לי מאתך המה
ח. כי שמתי לפניהם את־הדברים אשר שמת בפי והם שמעו ויכירו באמת כי מאתך יצאתי ויאמינו כי אתה שלחתני
ט. ואני בעדם מפגיע לא בעד העולם אפגע בך כי אם־בעד אלה אשר נתתה לי כי־לך המה
י. וכל־שלי שלך ושלך שלי אשר בם אתפאר
יא. לא אגור עוד בארץ והם גרים בארץ ואני בא אליך אבי קדשי שמר בשמך את־אלה אשר נתתה לי למען יהיו אחד כמנו
יב. בהיותי עמהם בעולם שמרתי אתם בשמך כל אשר נתתה לי שמרתי ולא־אבד אחד מהם זולתי בן־האבדון למלאת דבר־הכתוב
יג. ועתה הנני בא אליך והדברים האלה דברתי בארץ למלאת נפשם שמחתי
יד. אני נתתי להם דברך והעולם שנא אתם יען כי לא מן־העולם הם כאשר גם־אני לא מן־העולם אני
טו. ואני אינני מפגיע בעדם כי תקחם מן־העולם רק כי אם־תצילם מן־הרע
טז. לא מן־העולם הם כאשר גם־אני לא מן־העולם אני
יז. קדש אתם באמתך דברך אמת
יח. כאשר אתה שלחתני בעולם כן אני שלחתים בעולם
יט. ובעדם הקדשתי את־נפשי וכן גם־הם את־נפשם באמת יקדישו
כ. אולם לא בעד־אלה לבדם אני מעתיר לך כי אם־גם־בעד אלה אשר יאמינו בי על־פי דברם
כא. למען יהיו כלם לאחד כאשר אתה אבי בי ואני בך כן יהיו גם־הם בנו לבעבור יאמין העולם כי אתה שלחתני
כב. ואני נתתי להם את־הכבוד אשר נתתה לי לבעבור יהיו לאחד כאשר גם אנחנו אחד
כג. אני בהם ואתה בי למען יהיו תמים באחד ולמען ידע העולם כי אתה שלחתני וכי אהבת אתם כאשר אהבתני
כד. ואני חפצתי אבי כי אלה אשר נתתה לי יהיו עמי גם־הם באשר אהיה למען יראו את־כבודי אשר נתתה לי כי אהבת אתי טרם הוסד ארץ
כה. אבי הצדיק הן העולם איננו ידע אתך ואני ידעתיך ואלה ידעים כי אתה שלחתני
כו. הודעתי להם את־שמך וכן אוסיף להודיעם למען תהיה־בם האהבה אשר אהבתני וגם־אני אהיה בתוכם
| 
