1. हामीलाई होइन, हे परमप्रभु, हामीलाई होइन तर तपाईंको कृपा र सत्यताको खातिर तपाईंको नामलाई महिमा दिनुहोस्।
2. ‘तिनीहरूका परमेश्वर कहाँ छन्?’ भनी जाति-जातिका मानिसहरूले किन भन्न पाऊन्?
3. तर हाम्रा परमेश्वर स्वर्गमा हुनुहुन्छ; उहाँलाई जे इच्छा लाग्यो, त्यही गर्नुहुन्छ।
4. तिनीहरूका मूर्तिहरू त सुन र चाँदी हुन्; मानिसका हातका काम हुन्।
5. तिनीहरूका मुख छन् तर बोल्दैनन्; तिनीहरूका आँखा छन् तर देख्दैनन्;
6. तिनीहरूका कान छन् तर सुन्दैनन्; तिनीहरूका नाक छन् तर सुँघ्दैनन्;
7. तिनीहरूका हात छन् तर समात्दैनन्; तिनीहरूका खुट्टा छन् तर हिँड्दैनन्, न त आफ्ना गलाबाट आवाज निकाल्न सक्छन्।
8. तिनीहरूलाई बनाउने र तीमाथि भरोसा गर्नेहरू सबै त्यस्तै हुन्छन्।
9. हे इस्राएल, परमप्रभुमाथि भरोसा राख; उहाँ नै तिनीहरूका सहारा र रक्षक हुनुहुन्छ।
10. हे हारूनको घराना, परमप्रभुमाथि भरोसा राख; उहाँ नै तिनीहरूका सहारा र रक्षक हुनुहुन्छ।
11. हे परमप्रभुका भय मान्नेहरू हो, परमप्रभुमाथि भरोसा राख; उहाँ नै तिनीहरूका सहारा र रक्षक हुनुहुन्छ।
12. परमप्रभुले हाम्रो सम्झना गर्नुभएको छ; उहाँले हामीलाई आशिष् दिनुहुनेछ; उहाँले इस्राएलको घरानालाई आशिष् दिनुहुनेछ; उहाँले हारूनको घरानालाई आशिष् दिनुहुनेछ।
13. उहाँले परमप्रभुको भय मान्ने साना र ठूला दुवैलाई आशिष् दिनुहुनेछ।
14. परमप्रभुले तिमीहरूको वृद्धि गर्नुहुनेछ, तिमीहरू र तिमीहरूका सन्तानलाई।
15. स्वर्ग र पृथ्वी सृष्टि गर्नुहुने परमप्रभुबाट तिमीहरू आशिषित छौ।
16. स्वर्ग र स्वर्गहरू पनि परमप्रभुका हुन् तर पृथ्वी उहाँले मानिसका सन्तानलाई दिनुभएको छ।
17. मृतकहरूले परमप्रभुको स्तुति गर्दैनन्, न त मृतलोकमा जानेहरूले नै गर्दछन्;
18. तर हामी त अहिलेदेखि सदासर्वदासम्म परमप्रभुलाई धन्यको भन्नेछौं। परमप्रभुको स्तुति गर !
| 
