1. και οτε εισηλθεν εις Εκβατανα λεγει αυτω Αζαρια αδελφε απαγαγε με ευθειαν προς Ραγουηλ τον αδελφον ημων και απηγαγεν αυτον εις τον οικον Ραγουηλου και ευρον αυτον καθημενον παρα την θυραν της αυλης και εχαιρετισαν αυτον πρωτοι και ειπεν αυτοις χαιρετε πολλα αδελφοι και καλως ηλθατε υγιαινοντες και ηγαγεν αυτους εις τον οικον αυτου
2. και ειπεν Εδνα τη γυναικι αυτου ως ομοιος ο νεανισκος ουτος Τωβει τω αδελφω μου
3. και ηρωτησεν αυτους Εδνα και ειπεν αυτοις ποθεν εστε αδελφοι και ειπαν αυτη εκ των υιων Ηεφθαλιμ ημεις των αιχμαλωτισθεντων εν Ηινευη
4. και ειπεν αυτοις γινωσκετε Τωβιν τον αδελφον ημων και ειπαν αυτη γινωσκομεν ημεις αυτον
5. και ειπεν αυτοις υγιαινει και ειπαν αυτη υγιαινει και ζη και ειπεν Τωβιας ο πατηρ μου εστιν
6. και ανεπηδησεν Ραγουηλ και κατεφιλησεν αυτον και εκλαυσεν και ελαλησεν και ειπεν αυτω ευλογια σοι γενοιτο παιδιον ο του καλου και αγαθου πατρος ω ταλαιπωρων κακων οτι ετυφλωθη ανηρ δικαιος και ποιων ελεημοσυνας και επιπεσων επι τον τραχηλον Τωβια του αδελφου αυτου εκλαυσεν
7. και Εδνα η γυνη αυτου εκλαυσεν αυτον και Σαρρα η θυγατηρ αυτων εκλαυσεν και αυτη
8. και εθυσεν κριον εκ προβατων και υπεδεξατο αυτους προθυμως
9. και οτε ελουσαντο και ενιψαντο και ανεπεσαν δειπνησαι ειπεν Τωβιας τω Ραφαηλ Αζαρια αδελφε ειπον Ραγουηλ οπως δω μοι Σαρραν την αδελφην μου
10. και ηκουσεν Ραγουηλ τον λογον και ειπεν τω παιδι φαγε και πιε και ηδεως γενου την νυκτα ταυτην ου γαρ εστιν ανθρωπος ω καθηκει λαβειν Σαρραν την θυγατερα μου πλην σου αδελφε ωσαυτως δε και εγω ουκ εχω εξουσιαν δουναι αυτην ετερω ανδρι πλην σου οτι συ εγγιστα μου και μαλα την αληθειαν σοι υποδειξω παιδιον
11. εδωκα αυτην επτα ανδρασιν των αδελφων ημων και παντες απεθανον την νυκτα οποτε εισεπορευοντο προς αυτην και νυν παιδιον φαγε και πιε και κυριος ποιησει εν υμιν
12. και ειπεν Τωβιας ου μη φαγω εντευθεν ουδε μη πιω εως αν διαστησης τα προς εμε και ειπεν αυτω Ραγουηλ οτι ποιω και αυτη διδοται σοι κατα την κρισιν της βιβλου Μωυσεως και εκ του ουρανου κεκριται σοι δοθηναι κομιζου την αδελφην σου απο του νυν συ αδελφος ει αυτης και αυτη αδελφη σου δεδοται σοι απο της σημερον και εις τον αιωνα και ο κυριος του ουρανου ευοδωσει υμας παιδιον την νυκτα ταυτην και ποιησαι εφ υμας ελεος και ειρηνην
13. και εκαλεσεν Ραγουηλ Σαρραν την θυγατερα αυτου και ηλθεν προς αυτον και λαβομενος της χειρος αυτης παρεδωκεν αυτην αυτω και ειπεν κομισαι κατα τον νομον και κατα την κρισιν την γεγραμμενην εν τη βιβλω Μωυσεως δουναι σοι την γυναικα εχε και απαγε προς τον πατερα σου υγιαινων και ο θεος του ουρανου ευοδωσαι υμιν ειρηνην
14. και εκαλεσεν την μητερα αυτης και ειπεν ενεγκειν βιβλιον και εγραψεν συγγραφην βιβλιου συνοικησεως και ως διδωσιν αυτην αυτω γυναικα κατα την κρισιν του Μωυσεως νομου απ εκεινου ηρξαντο φαγειν και πιειν
15. και εκαλεσεν Ραγουηλ Εδναν την γυναικα αυτου και ειπεν αυτη αδελφη ετοιμασον το ταμιειον το ετερον και εισαγαγε αυτην εκει
16. και βαδισασα εστρωσεν εις το ταμιειον ως ειπεν αυτη και ηγαγεν αυτην εκει και εκλαυσεν περι αυτης και απεμαξατο τα δακρυα και ειπεν αυτη
17. θαρσει θυγατερ ο κυριος του ουρανου δωη σοι χαραν αντι της λυπης σου θαρσει θυγατερ και εξηλθεν
| 
