א. וארא מלאך יורד מן־השמים ובידו מפתח התהום ורתק גדול
ב. ויתפש את־התנין את־הנחש הקדמני הוא השטן השוטן ויאסר אתו לאלף שנים
ג. וישליכהו אל־התהום ויסגר עליו ויחתם מעל למסגר לבלתי ידיח עוד את־הגוים עד־תם השנים אלף ואחרי־כן יתר לזמן קטן
ד. וארא כסאות עמדים ולישבים עליהם נתן בידם לעשות משפט ונפשות כרותי ראש למען עדות ישוע ולמען דבר האלהים אשר לא השתחוו לחיה ולצלמה ולא נתנו את־התו על־מצחם וידם הם קמו ויחיו וימלכו עם־המשיח אלף שנים
ה. ויתר המתים לא־קמו לחיים עד־תם אלף השנים זאת היא התקומה הראשנה
ו. אשרי אנשי־קדש אשר יקחו חלקם בתקומה הראשנה המות לא ישלט־בם שנית כי כהנים יהיו לאלהים ולמשיחו ומלכו עמו אלף שנים
ז. ואחרי כלות אלף השנים יתר השטן מבית כלאו
ח. ויצא להדיח את־הגוים בארבע כנפות הארץ את־גוג ומגוג ולהקהילם למלחמה קהל אשר לא יספר כחול הים
ט. ויעלו על־מרחבי ארץ ויסבו את־מחנה הקדושים ואת־העיר הנחמדה ותרד אש מאת האלהים מן־השמים ותאכל אתם
י. והשטן אשר הדיחם נדח לים בער באש וגפרית אשר־שם החיה ונביא השקר להיות מענים שם יומם ולילה עד־עולמי עולמים
יא. וארא כסא זך וגדול והישב עליו אשר ארץ ושמים נדדו מפניו ולא־נודע מקומם איו
יב. וארא את־המתים גדולים עם־קטנים עמדים לפני־יהוה וספרים נפתחים גם־ספר אחר נפתח הוא ספר החיים וישפטו המתים כעלילותם כאשר הם כתובים בספרים ההם
יג. ויתן הים את־המתים אשר בתוכו והמות והשאול נתנו את־המתים אשר־בם וישפטו איש איש כמעשהו
יד. והמות והשאול נהדפו אל־תוך ים בער באש זה הוא המות השני הים הבער באש
טו. וכל־איש אשר לא־נמצא כתוב בספר החיים נהדף אל־תוך הים הבער באש
| 
