1. हे मेरो छोरा, मेरो अर्तीलाई नबिर्सी; तर तेरो हृदयमा मेरा आज्ञाहरू जोगाइराख्;
2. किनभने त्यसले तँलाई दीर्घायु र पूर्णजीवन दिनेछ, अनि तेरो उन्नति गराउनेछ।
3. तँलाई प्रेम र विश्वसनीयताले कहिल्यै नछोडून्, ती तैँले आफ्नो गलामा बाँधिराख्, आफ्नो हृदयको पाटीमा लेखिराख्;
4. तब तैँले परमेश्वर र मानिसको दृष्टिमा निगाह र असल समझ पाउनेछस्।
5. आफ्नो सारा हृदयले परमप्रभुमा भरोसा राख् र तेरो आफ्नै समझशक्तिमा भर नपर्।
6. आफ्ना सारा मार्गमा उहाँलाई सम्झी र उहाँले तेरा मार्गहरू सुगम तुल्याइदिनुहुनेछ।
7. आफैंलाई बुद्धिमान् नसम्झी, तर परमप्रभुको भय मान् र दुष्टताबाट अलग बस्।
8. यसले तेरो शरीरलाई स्वस्थ तुल्याउनेछ र तेरो हड्डीको लागि पोषण दिनेछ।
9. आफ्नो धनसम्पत्ति र सबै उब्जनीको अगौटे फलले परमप्रभुको आदर गर्;
10. तब तेरा ढुकुटीहरू अन्नले भरिएर पोखिनेछन् र तेरा मशक नयाँ अङ्गुरमद्यले भरिभराउ हुनेछन्।
11. हे मेरो छोरा, परमप्रभुको अनुशासनलाई तुच्छ नठान् र उहाँको हप्कीलाई तिरस्कार नगर्;
12. किनभने जसलाई परमप्रभुले प्रेम गर्नुहुन्छ, त्यसैलाई उहाँले हप्काउनुहुन्छ, र बाबुले प्यारो छोरालाई ताडना दिएझैँ उहाँले पनि दिनुहुन्छ।
13. धन्य हो, त्यो मानिस जसले बुद्धि प्राप्त गर्छ र समझशक्ति हासिल गर्छ।
14. किनकि बुद्धि चाँदीभन्दा धेरै उत्तम हुन्छ र त्यसबाट हुने फाइदा सुनभन्दा मूल्यवान् हुन्छ।
15. त्यो मुगा-मोतीभन्दा पनि बहुमूल्य हुन्छ, र तैँले इच्छा गरेको कुनै पनि थोकसँग तुलना गर्न सकिँदैन।
16. बुद्धिको दाहिने हाततिर दीर्घायु र त्यसको देब्रे हाततिर धन र सम्मान हुन्छन्।
17. त्यसका मार्गहरू मनोहर हुन्छन्, र सबै बाटोहरू शान्तमय हुन्छन्।
18. बुद्धिलाई अँगाल्नेहरूका निम्ति त्यो जीवनको रूख हो र त्यसलाई पक्रनेहरू धन्यका हुन्।
19. बुद्धिद्वारा परमप्रभुले पृथ्वीको जग बसाल्नुभयो र समझशक्तिद्वारा उहाँले आकाश स्थापित गर्नुभयो।
20. उहाँको ज्ञानद्वारा गहिरा सागरहरू विभाजित भए र बादलले शीत झारे।
21. हे मेरो छोरा, उत्तम बुद्धि र विवेकलाई जोगाइराख्, तेरो दृष्टिबाट तिनलाई उम्केर जान नदे;
22. ती तेरो प्राणको निम्ति जीवन र तेरो गलाको निम्ति सम्मानको हार हुनेछन्।
23. तब तँ आफ्नो बाटोमा निष्फिक्रीसाथ हिँड्नेछस्, र तेरा खुट्टाले ठेस खानेछैनन्।
24. जब तँ ढल्किनेछस् तँ डराउनेछैनस्, जब तँ ढल्किनेछस् तँलाई मीठो निद्रा लाग्नेछ।
25. एक्कासि आइपर्ने विपत्तिदेखि नडरा, दुष्टहरूमाथि आइपर्ने विनाशदेखि पनि नडरा।
26. किनभने परमप्रभु तेरा पक्षमा हुनुहुनेछ, उहाँले तेरो खुट्टालाई पासोमा पर्नदेखि जोगाउनुहुनेछ।
27. जसलाई भलाइ गर्नुपर्छ, तेरो औकात होउन्जेल त्यसलाई दया देखाउन अस्वीकार नगर्।
28. तँसित छ भने तेरो मित्रलाई, ‘फेरि आऊ, भोलि दिनेछु,’ भनी नभन्।
29. जो तेरो नजिक भरोसा राखेर बस्दछ, त्यसको विरुद्धमा षडयन्त्र नरच्।
30. जसले तेरो कुनै खराबी गरेको छैन, बिनाकारण त्यसलाई दोष नलगा।
31. हिंसात्मक मानिसको ईर्ष्या नगर् र त्यसको कुनै पनि मार्गलाई नछान्।
32. किनकि परमप्रभुले दुष्ट मानिसलाई घृणा गर्नुहुन्छ; तर धर्मी मानिसलाई उहाँले आफ्नो भेद प्रकट गर्नुहुन्छ।
33. दुष्टको घरमा परमप्रभुको श्राप आइपर्छ; तर धर्मीजनको वासस्थानलाई उहाँले आशिष् दिनुहुन्छ।
34. घमन्डी मानिसलाई परमेश्वरले घृणा गर्नुहुन्छ; तर नम्रहरूलाई उहाँले अनुग्रह गर्नुहुन्छ।
35. बुद्धिमान्को भाग आदर हो; तर मूर्खको भाग अपमान हो।
| 
