1. हे मेरो प्राण, परमप्रभुलाई धन्यको भन्, हे मेरो सारा अन्तस्करण, उहाँको पवित्र नाउँलाई धन्यको भन्।
2. हे मेरो प्राण, परमप्रभुलाई धन्यको भन्, र उहाँका सबै उपकार नबिर्सी,
3. उहाँले तेरा सबै अधर्म क्षमा गर्नुहुन्छ, उहाँले तेरा सबै रोग निको पार्नुहुन्छ,
4. उहाँले तेरो जीवनलाई विनाशबाट छुटाउनुहुन्छ, उहाँले तँलाई करुणा र कोमल कृपाको मुकुट पहिराइदिनुहुन्छ,
5. उहाँले तेरो मुखलाई असल कुराले तृप्त पार्नुहुन्छ, जसले गर्दा तेरो जवानी चिलको झैँ फेरि नयाँ हुन्छ।
6. परमप्रभुले थिचोमिचोमा परेकाहरू सबैका लागि धार्मिकता र न्यायको काम गर्नुहुन्छ।
7. उहाँले मोशालाई आफ्ना मार्ग र इस्राएलका सन्तानलाई आफ्ना काम प्रकट गर्नुभयो।
8. परमप्रभु कृपालु र अनुग्रही हुनुहुन्छ, रिसाउनमा ढिलो र अति करुणामय हुनुहुन्छ।
9. उहाँले सधैँ हप्काइरहनुहुन्न, न त सधैँभरि आफ्नो रिस नै लिइरहनुहुन्छ।
10. उहाँले हामीसँग हाम्रा पापअनुसार व्यवहार गर्नुभएको छैन, न त हाम्रा अधर्मअनुसार हामीलाई प्रतिफल दिनुभएको छ।
11. किनकि पृथ्वीबाट स्वर्ग जति अग्लो छ, उहाँका भय मान्नेहरूमाथि उहाँको कृपा त्यतिकै महान् छ।
12. पश्चिमबाट पूर्व जति टाढा छ, उहाँले हाम्रा अपराध हामीबाट त्यतिकै टाढा हटाइदिनुभएको छ।
13. जसरी बाबुले आफ्ना छोराछोरीलाई टिठयाउँछन्, त्यसरी नै उहाँका भय मान्नेहरूलाई परमप्रभुले टिठयाउनुहुन्छ।
14. किनकि उहाँले हाम्रो बनोट जान्नुहुन्छ, हामी धुलो मात्र हौं भनी उहाँ सम्झनुहुन्छ।
15. मानिसको आयु त घाँसजस्तै छ, मैदानको फूलझैँ त्यो ढकमक्क फुल्दछ,
16. किनकि बतास त्यसमाथि भएर जाँदा त्यो रहँदैन, अनि त्यसले आफ्नो ठाउँ फेरि चिन्दैन।
17. तर परमप्रभुको कृपा उहाँको भय मान्नेहरूमाथि र उहाँको धार्मिकता नातिपनातिमाथि सनातनदेखि सनातनसम्म रहिरहन्छ,
18. उनीहरूमाथि, जसले उहाँका करार पालन गर्छन् र जसले उहाँका आज्ञाहरू पालन गर्न ध्यान दिन्छन्।
19. परमप्रभुले स्वर्गमा आफ्नो सिंहासन स्थापित गर्नुभएको छ, अनि उहाँको राज्यले सबैमाथि शासन गर्दछ।
20. हे उहाँका स्वर्गदूतहरू हो, उहाँको वचन पालन गर्ने शक्तिशाली जन हो, र उहाँको वचनमा ध्यान दिनेहरू हो, परमप्रभुलाई धन्यको भन।
21. हे उहाँका सबै सेनाहरू हो, उहाँका इच्छाअनुसार काम गर्ने उहाँका सेवकहरू हो, परमप्रभुलाई धन्यको भन।
22. हे परमप्रभुका सारा सृष्टि हो, उहाँका समस्त राज्यमा रहेकाहरू हो, परमप्रभुलाई धन्यको भन, ए मेरो प्राण, परमप्रभुलाई धन्यको भन् !
| 
