भजनसंग्रह, Chapter 3

1. हे परमप्रभु, मेरा शत्रुहरू कति धेरै ! मेरो विरुद्धमा उठ्नेहरू कति धेरै छन्।    2. मेरो विषयमा धेरैले यसो भन्छन्, ‘‘परमेश्वरले त्यसलाई सहायता गर्नुहुनेछैन।’’ सेला    3. हे परमप्रभु, तपाईं नै मेरो वरिपरि सुरक्षाको ढाल हुनुहुन्छ, तपाईं मेरो गौरव र मेरो शिर उच्च पारिदिने हुनुहुन्छ।    4. मैले उच्च सोरले परमप्रभुलाई पुकारेँ र उहाँले आफ्नो पवित्र पर्वतबाट मलाई जवाफ दिनुभयो। सेला    5. म ढल्केँ र निदाएँ, म बिउँझेँ, किनकि परमप्रभुले मलाई सम्हाल्नुभयो।    6. म, मेरो विरुद्धमा चारैतिरबाट उठेका दशौं हजार मानिसदेखि डराउनेछैनँ।    7. हे परमप्रभु ! उठ्नुहोस्, हे मेरा परमेश्वर ! मलाई बचाउनुहोस्, किनकि तपाईंले मेरा सबै शत्रुका गालामा चड्काउनुभएको छ, तपाईंले दुष्टहरूका दाँत भाँचिदिनुभएको छ।    8. परमप्रभुबाट छुटकारा आउँछ। तपाईंको आशीर्वाद तपाईंका जनमाथि होस्। सेला