1. परमप्रभु महान् हुनुहुन्छ र हाम्रा परमेश्वरको शहरमा, उहाँको पवित्र पर्वतमा उहाँ अति नै स्तुतिको योग्य हुनुहुन्छ।
2. उचाइमा अति नै सुन्दर, सम्पूर्ण पृथ्वीको हर्षको कारण सियोन पर्वत हो, जो उत्तरमा अवस्थित छ, त्यो महाराजाको शहर हो।
3. त्यसका महलहरूमा परमेश्वर शरणस्थानको रूपमा परिचित हुनुहुन्छ।
4. किनकि हेर, राजाहरू भेला भए, तिनीहरू सँगसँगै दल बाँधेर अघि बढे।
5. तिनीहरूले त्यसलाई देखेर चकित भए, तिनीहरू आतङ्कित भए र भागे।
6. त्यहीँ नै तिनीहरू थरथरी काँपे, र तिनीहरू प्रसववेदनामा परेकी स्त्रीजस्तै भए।
7. तपाईंले पूर्वीय बतासले तर्शीशका जहाजहरू भत्काउनुहुन्छ।
8. जस्तो हामीले सुनेका छौं, त्यस्तै हामीले सेनाहरूका परमप्रभुको शहर, हाम्रा परमेश्वरको शहरमा देखेका छौं, परमेश्वरले त्यसलाई सधैँका निम्ति सुरक्षित राख्नुहुनेछ। सेला
9. हे परमेश्वर, तपाईंको मन्दिरको बीचमा हामीले तपाईंको कृपाको बारेमा सोचेका छौं।
10. हे परमेश्वर, जस्तो तपाईंको नाम छ, त्यस्तै तपाईंको प्रशंसा पनि पृथ्वीको छेउछेउसम्म हुन्छ, तपाईंको दाहिने हात धार्मिकताले भरिपूर्ण छ।
11. तपाईंका न्यायको कारण सियोन पर्वत रमाओस्, यहूदाका छोरीहरू आनन्दित होऊन्।
12. सियोनको चारैतिर घुम, यसलाई परिक्रमा गर, यसका धरहराहरू गन।
13. त्यसका पर्खालहरूमाथि राम्ररी दृष्टि लगाओ, त्यसका महलहरूमा ध्यान देओ, यसैले कि तिमीहरूले भावी पुस्तालाई यो कुरा बताउन सक।
14. किनकि यिनै परमेश्वर सदासर्वदा हाम्रा परमेश्वर हुनुहुन्छ, उहाँ मृत्युसम्मै हाम्रा अगुवा हुनुहुनेछ।
| 
