भजनसंग्रह, Chapter 75

1. हे परमेश्वर, हामी तपाईंलाई धन्यवाद चढाउँछौं, तपाईंलाई हामी धन्यवाद चढाउँछौं, किनकि तपाईंको उपस्थिति नजिकै छ, भन्ने कुरा तपाईंका अचम्मका कामले बयान गर्छन्।    2. जब म सभा ग्रहण गर्नेछु, तब म निष्पक्षतासाथ न्याय गर्नेछु।    3. जब पृथ्वी र त्यसका सबै बासिन्दा काम्छन्, त्यसका खम्बाहरूलाई म थामिराख्नेछु। सेला    4. मैले मूर्खहरूलाई भनेँ, ‘‘मूर्ख व्यवहार नगर।’’ अनि दुष्टहरूलाई भनेँ, ‘‘सिङ ठाडो नपार।’’    5. आफ्नो सिङ धेरै ठाडो नपार, जिद्दी गरेर नबोल।    6. किनकि पदोन्नति न पूर्वबाट, न पश्चिमबाट न त दक्षिणबाट नै आउँछ।    7. किनभने परमेश्वर नै न्यायकर्ता हुनुहुन्छ, उहाँले एउटालाई होच्याउनुहुन्छ र अर्कोलाई उच्च पार्नुहुन्छ।    8. किनकि परमप्रभुको हातमा कचौरा छ, अनि अङ्गुरमद्य रातो छ, त्यसमा मसला मिसाइएको छ, अनि त्यसैबाट उहाँले खन्याउनुहुन्छ, तर पृथ्वीका दुष्टहरूले त्यसका थिग्रासमेत निचोरेर पिउनेछन्।    9. तर म त सदासर्वदा घोषणा गर्नेछु, म याकूबका परमेश्वरको स्तुति गाउनेछु।    10. म दुष्टहरूको सबै सिङ काटिदिनेछु, तर धर्मीजनका सिङहरू उच्च पार्नेछु।